“PILIPINAS GOT TALENT,” ILULUNSAD NA SA ABS-CBN; AUDITIONS SISIMULAN NA

Tunghayan ang husay at talento ng Pinoy sa nalalapit na pagsisimula ng pinakamalaking primetime talent-reality search sa bansa— ang “Pilipinas Got Talent.”

Iikutin ng ABS-CBN ang buong bansa para hanapin ang pinakamagaling at pinakanakagigilalas na kakayahan ng Pinoy, mapabata man o matatanda, kasama siyempre ang napiling hosts na sina Luis Manzano at Billy Crawford.

“Magiging kuya kami ng mga contestants dito. Hindi tulad ng nakaraan naming hosting stints, mas malapit kami dito sa mga contestants. Kikilalanin namin sila talaga at aalamin ang kwento ng buhay nila na siyang dapat abangan ng mga manonood, “ paliwanag ni Billy na aminadong fan ng Got Talent sa US bago siya bumalik ng Maynila para mag-host ng “Pinoy Dream Academy” noong nakaraang taon.

Sina Luis at Billy ang magiging counterpart nina Ant at Dec ng Britain. Gagamitin nila ang kanilang kwela’t karisma sa paggabay sa mga contestants sa kanilang buong paglalakbay sa kumpetisyon.

“Excited na talaga ako sa PGT lalo pa’t kasama ko si Billy na madalas ko ng kasama sa ASAP bilang Kanto Boys. Kaabang abang po kung ano magiging kulitan at hiritan namin sa show na to,” sabi ni Luis.

Ang “Pilipinas Got Talent” ay magbibigay pagkakataon sa mga Pinoy na ipamalas ang kanilang husay at galing sa anumang larangan. Bukas ito sa lahat ng nais sumali— anu mang edad at kahit ilang miyembro— basta may talento, mapa-kanta, pagsayaw, o pag-arte pati na rin kakaibang mga talento tulad ng pag-mamagic o pagpapatawa.

Una ng pinatunayan nina Madonna Decena at Charlie Green na ang mga Pinoy ay sagana sa talento ng maging semi-finalist sila sa pinaka-popular na bersyon ng “Got Talent” na “Britain’s Got Talent.”

“Hindi matatawaran ang mga judges natin. Talagang mabusisi ang kanilang mata pagdating sa talento at tiyak matututo ang mga contestants sa kanila habang umuusad pa sila sa kumpetisyon. Kailangan lang talaga nila ibigay ang best nila at i-enjoy nila yung ginagawa nila,” dadgdag pa ni Luis

Kaya naman sa mga gustong ipakita ang kanilang mga talento, huwag palalampasin ang unang auditions ng “Pilipinas Got Talent” sa Lyceum of the Philippines sa Batangas sa darating na Nov. 6, 7, at 8. Magkakaroon din ng auditions sa Cebu sa Nov. 11, 12, at 13; Baguio sa Nov. 19, 20, at 21; at Cagayan De Oro sa Nov. 25, 26, at 27; Davao sa Nov 30, Dec. 1 at 2 ; at Manila sa Dec 5, 6, 12, and 13.

Para sa karagdagang impormasyon bisitahin lamang ang official PGT website sa http://pilipinasgottalent.abs-cbn.com.

Tunghayan sina Luis at Billy sa nalalapit na pag-uumpisa ng “Pilipinas Got Talent” sa ABS-CBN.

Posted in: Billy Crawford, Luis Manzano, Pilipinas Got Talent